ఆంధ్రభారతి - తాళ్లపాక అన్నమాచార్య కీర్తనలు - ఎవ్వారు లేరూ హితవు చెప్పఁగ వట్టి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 3-2
సంపుటము: 1-15

తాళ్లపాక అన్నమాచార్య

రాగము: వరాళి

ఎవ్వారు లేరూ హితవు చెప్పఁగ వట్టి నొవ్వులఁ బడి నేము నొగిలేమయ్యా	॥ఎవ్వారు॥
అడవిఁ బడినవాఁడు వెడలఁ జోటులేక తొడరి కంపలకిందు దూరినట్లు నడుమ దురితకాననముల తరిఁ బడి వెడలలేక నేము విసిగేమయ్యా	॥ఎవ్వారు॥
తెవులు వడినవాఁడు తినఁబోయి మధురము చవిగాక పులుసులు చవి గోరినట్లు భవరోగములఁ బడి పరమామృతము నోరఁ జవిగాక భవముల చవులాయనయ్యా	॥ఎవ్వారు॥
తనవారి విడిచి యితరమైనవారి వెనకఁ దిరిగి తా వెఱ్ఱైనట్లు అనయము తిరువేంకటాధీశుఁ గొలువక మనసులోనివాని మఱచేమయ్యా	॥ఎవ్వారు॥