కఱివేల్పుశతకము వైదర్సు అప్పయకవి - ఆంధ్రభారతి - శతకములు - కఱివేల్పు శతకము కఱివేల్పు శతకం కఱివేల్పుశతకం కరివేల్పుశతకము కరివేల్పుశతకము కరివేల్పు శతకం కరివేల్పుశతకం

కఱివేల్పుశతకము - వైదర్సు అప్పయకవి
సీ.	సిరిమించుమించు వైఖరి గనుపట్టు హొం- \| బట్టుదుప్పటివల్లెవాటు మణికి- రీటంబునీటు సిరిమెఱుంగుఁబోఁడితో \| బుట్టిన గొప్పకెంపుపతకంబు కమ్మకస్తురితిలకంబు డంబువిడంబ- \| నం బొనర్పఁ జతుర్భుజంబులందుఁ జిందంబు సుడివాలు సింగాణి యడిదంబు \| గద మొదలగు నైదుకైదువులను
గీ.	బూని దేవకికడుపునఁ బుడుతవడువు \| నఁ బొడమి, పుడమిజడు పుడుపఁ బచరించి- నట్టి నా సామి నీకు జోహారు సేతు \| బళిర కఱివేల్ప! పసిఁడిదువ్వలువదాల్ప!	1
సీ.	మొలకనగవు ముద్దుమొగము చిగురుమోవి \| మెఱుఁగుఁజెక్కుల మిసమిస లెసఁగ, నొ- సలిపై ముసరి పెంపెసలు గూర్చు కురులఁ గ- \| న్నులఁ దీర్చి బుగ్గపై నిలిపినట్టి చిన్నికాటుకచుక్క చెలువంపు బొమల న- \| డుమనిడ్డ యుక్కబొట్టు చెలువడర నడుగుఁదమ్మికి గంగ యలరుదేనియఁగా నె- \| గడుతండ్రివి యశోద పుడిసెడు జల-
గీ.	ములకు నుగ్గు గుడిచి, యల నలువఁ గన్న \| బొడ్డుతామర కొకగుడ్డ యడ్డ మునుప దగుదునని పవ్వళించితే తల్లియొద్ద \| బళిర కఱివేల్ప! పసిఁడిదువ్వలువదాల్ప!	2
సీ.	జతకుల్కు తళ్కువజ్రాలకళాసిగీ \| పని చొకాటంపు కుందనపురావి- రేక నుదుట నుదుటై కనుపింపఁ జెం- \| పల పక్కిరాపచ్చబావిలీ ల- సదుక్రొంబసల నించ నెదపయి పైగోవ \| కెంపురారవ చెక్కడంపు జాళు- వా గొలుసుకొన మువ్వన్నెమెకముగోళ్ళ \| మెఱుఁగు తురఁగలింప మేల్కడాని
గీ.	తాయెతుల్సందిట నటింపఁ దల్లిమ్రోలఁ \| జెలువు దీపింప ముద్దులుసేయు నీదు చక్కఁదనమెన్న వేనోళ్లు చాలవన్న \| బళిర కఱివేల్ప! పసిఁడిదువ్వలువదాల్ప!	3
సీ.	పొంచి తల్లిని మఱపించి బాళ్వామొల \| నూల్చిఱుగంటల నుడి నడంచి పసిఁడిగజ్జెలను జొప్పడెడు చప్పుడుకుంచి \| కుందనపు మురిడిగొలుసును మురుఁ- గునఁ గట్టిగ బిగించి గూనలఁ చెయి ముంచి \| చిన్ని బొజ్జపయి పాల్చినుకఁ గనక- హస్తపల్లవమున హస్తపల్లవము నొం- \| డొండ నుంచి భుజంబు లుబ్బఁ బెంచి
గీ.	మెడ నొకించుక కుదియించి మేను వంచి \| కడలు వీక్షించి నీవు మీఁగడ భుజించు చక్కఁదనమెన్న వేనోళ్లు చాలవన్న \| బళిర కఱివేల్ప! పసిఁడిదువ్వలువదాల్ప!	4
సీ.	కలికి యిచ్చిన పాలు కడుపు నిండనిలాగు \| రక్కసివిసపుఁ బాల్గుక్కకొనుట తరుణి పెట్టిన వెన్నఁ దనివి దీఱనియట్లు \| వ్రేపల్లె మ్రుచ్చిలి వెన్నఁ దినుట నతివ గట్టిన చల్ది యాపోవనటువలె \| విప్రభార్యల బువ్వ వేఁడికొనుట నన్నొసంగిన కజ్జమాస దీఱనిరీతి \| మేలియపూపముల్ చాలఁ గొనుట
గీ.	రట్టడితనానఁ దల్లిని రవ్వసేయఁ \| దలఁచి కాక జగంబులు గలుగ నీదు బొజ్జ నిండింప నెవ్వరు పూనువారు \| బళిర కఱివేల్ప! పసిఁడిదువ్వలువదాల్ప!	5
సీ.	మెయిఁ బర్వు కార్చిచ్చు మీఁగడపరకయే \| యట్టె కైకొని వడి నారగింప రక్కసివిసపు పాల్మిక్కుటంబయ్యెనే \| గుటుకుగుటుక్కున గ్రుక్కగొనఁగ సుడిగాడ్పురాకాసి మెడఁ దూగుటుయ్యలే \| యొప్పఁగా మిన్నంది యూఁచుకొనఁగ చట్టొకకొంచెపు సంగడంబయ్యెనే \| నిలిచి కెంగేలను నిగుడఁబట్ట
గీ.	దేవరకు నీకుఁ జెల్లె నీవేవి దలఁప \| వా యశోదయు నినుఁ గొనియాడుచుండు పొలఁతి నేఁ జెల్ల నీ పోవు పోకలెల్ల \| బళిర కఱివేల్ప! పసిఁడిదువ్వలువదాల్ప!	6
సీ.	తళుకుబంగరు పారదంపుమువ్వాయెనో? \| గాటంపు ఱోల్మొలఁ గట్టుకొనుట! దినము మ్రుచ్చుతనానఁ దిను వెన్న యఱుఁగనో? \| చొచ్చి కార్చిచ్చును జుఱ్ఱికొనుట! పూతన చనుపాలఁ బొడము చేఁదడఁగనో? \| వ్రేతవాతెర మేల్నవాతు గొనుట! బడిబడి నేతెంచు పగఱకు వెఱచియో? \| పసికాఁపుపూఁబోండ్ల ప్రాపుఁ గొనుట!
గీ.	తనకు నొడ లోముకొనుటయుఁ దథ్యమే క- \| దా! “శరీరమాద్యం ఖలు ధర్మసాధ- న”మ్మనెడు మాట తన నెమ్మనమ్ము నాట \| బళిర కఱివేల్ప! పసిఁడిదువ్వలువదాల్ప!	7
సీ.	సొగసుగా నునుకురు లెగదువ్వి కట్టిన \| తళుకుబంగరుజోరెత్రాఁడు సెలఁగ, నెలనెలఁ గల చెన్నునెన్ను నెన్నుదుటిపై \| జిలుఁగుకస్తురిరేఖ చెలువు మీఱ, నొడికమై చెవుల నొప్పెడి గొప్పసుప్పాణి \| చౌకట్ల తెలిడాలు చౌకళింప, గుదిఁగూర్చి యెదఁ జేర్చుకొనిన గుప్పెడుతళ్కు \| బంగరుగొలుసులు రంగులీన,
గీ.	సరిగపనికుట్టు హొంబట్టు చల్లడంపు \| డంబు గనుపింప బురుసారుటంపు కాసె చెఱఁగు లల్లాడవచ్చు నీ యొఱపయారె \| బళిర కఱివేల్ప! పసిఁడిదువ్వలువదాల్ప!	8
సీ.	నీ నగుమోము నీ నిద్దంపుఁజెక్కులు \| నీ నిగారంపు పెన్నెరులు నీ రు- వారంపుకౌను నీ వాటంపుచూపు నీ \| చిగురాకుమోవి నీ సొగసులౌ క- నుబొమలు నీ చిన్నినూనూఁగుమీసపు \| రేఖలు నీ ముప్పిరిగొనిన పెను- దొడలు నీ తలిరాకుటడుగులు నీ చొకా- \| టపుసోఁగముక్కు నీ డంబయిన గ-
గీ.	ళంబు నీ బిత్తరంపుటురంబు నీ యొ- \| యారపుం గండెపు భుజంబులట్టె గన్న వనిత లేమయ్య మగవారె నలతురయ్య \| బళిర కఱివేల్ప! పసిఁడిదువ్వలువదాల్ప!	9
సీ.	గండస్థలంబులఁ గఱఁగెడు మదధార \| కరణి గడ్డము నునుకప్పుఁ దేర మోము చందురునందు మొనసిన కందునా \| జోకయై మీసపురేక దోఁచ సిరివెలందుక కొల్వుచేయు జేజేరాచ \| రాగద్దె యన ఱొమ్ము రమణ యెసఁగఁ తనుతమాలద్రుమంబునఁ బెనుపొందు శా- \| ఖలనఁగ దీర్ఘబాహులు సెలంగఁ
గీ.	జారు సికతోడ జాళువా కేసరులతోడ \| నివ్వటిలు నీదు నూనూఁగు జవ్వనంపు హొయలు గని రాధ పయిఁబడకున్నె యహహ \| బళిర కఱివేల్ప! పసిఁడిదువ్వలువదాల్ప!	10
సీ.	ఇరుగ్రేవ సిగపొందు నెనయ సంపెగమొగ్గ \| నిగ్గు తాయెతుచుట్లు నీటు సూప, గంధంబు నునుపూతగాఁ బూసి తీర్చిన \| ఱొమ్ము కస్తురిపట్టె లెమ్మె నెఱప, పావలంటి సెలంగు పైఠాణి సెఱఁగుల \| దువ్వల్వవలెవాటు నివ్వటిల్ల, పసిఁడినిండొరనంటి యెసఁగు నేనికపంటి \| దూబిడి నిడుసోగ తొంగలింప,
గీ.	వచ్చి నినుఁ జూడ నీతోడ ముచ్చటాడ \| కోర్కెలొనఁగూడఁ గవఁగూడ గుట్టువీడ కౌనులల్లాడఁ గనుచుండుఁ గలికిపిండు \| బళిర కఱివేల్ప! పసిఁడిదువ్వలువదాల్ప!	11
సీ.	చికిలిమేల్బంగరు చిలుకు గోణమ్ముతో \| మొల కుందనపుఁ జేల మురువుతోడ నపరంజిచాయ నిద్దపు రువారంబుతో \| మొసలివాపోగుల మిసిమితోడ ముక్కున హురుముంజి ముత్యంపు మురుగుతో \| కొనచెవి బావిలీ కొమరుతోడ రాణించు జిగిపచ్చరాచిల్క తాలితో \| ప్రాఁగెంపు రాపాడు పత్రితోడఁ
గీ.	జెలఁగు నినుఁజూచు వ్రేరాచచిగురుఁబోండ్ల \| తాలిమి బిరానఁ జింపఁ గెందలిరుటలుఁగు నించువిలుకాఁడు చికిలి సేయించుగదర \| బళిర కఱివేల్ప! పసిఁడిదువ్వలువదాల్ప!	12
సీ.	సిరిపొత్తునకు నిన్నుఁ జేరనీయదొ కదా \| వ్రేపల్లెఁ బెఱుఁగుట వినియెనేని, కలిమితొయ్యలి నెమ్మొగంబుఁ ద్రిప్పునొ కదా \| చిల్లరకథలెల్లఁ జెవులఁబడిన, ననవిలుతల్లి పక్కున నవ్వునే గదా \| వావిమాలిన యత్తవార్త వినిన, రేరేనితోఁబుట్టు గ్రేణి సేయునె కదా \| సత్య పెన్‍జడవేటు జాడఁ గన్న-
గీ.	ననుచు మదిఁ గొంతసంశయంబయ్యె మాకు \| నైననేమాయె జాణవీ వట్టులేని లేని వగలెల్లఁ గొన్నిఁ గల్పించలేవె, \| బళిర కఱివేల్ప! పసిఁడిదువ్వలువదాల్ప!	13
సీ.	కట్టడివై బలిఁ గట్టివేయఁగఁ గదా \| చెలి నిండుకౌఁగిటఁ జిక్కవలసె, పొంచి కోలను వాలిఁ బొలియించఁగాఁ గదా \| మెలఁత కన్సన్నల మెలఁగవలసె, వెలఁదికై శివుని విల్విఱిచివేయఁగఁ గదా \| మదిరాక్షి బొమముళ్ళ కొదుగవలసె, మగువవై శితికంఠు మరులుగొల్పఁగఁ గదా \| విరిఁబోండ్ల వెనువెంటఁ దిరుగవలసె-
గీ.	నటుల నిటు నీకుఁ జేచేత నత్తచేత \| ననుభవంబయ్యె నింక నీకీ యత్త యెదుట నేమి కానున్నదో కదా యెఱుఁగఁ గాని \| బళిర కఱివేల్ప! పసిఁడిదువ్వలువదాల్ప!	14
సీ.	కర్ణాటకపు సిగ గనుపట్టు నునుపట్టు \| పొంది క్రొందళ్కులందందుఁ బర్వ సొగసు రా రాజాతి మగరాకళాసిగీ \| గెల్లాపటాతేట గ్రేళ్లు దాఁట తోరమౌ ముత్యాలఁ దులకింపు కెంపుల \| చెంపఖల్లీరుచుల్ చెంగలింప నపరంజిప్రతిమ నిద్దపు మనీలాపని \| బాజుబందుల ఠీవి పరిఢవిల్ల
గీ.	నెసఁగు నిను నొంటిఁ గనియట్టి పసిడివంటి \| పాయమెల్లను నీ పాలు సేయఁగోరి మమత పాలయ్యె గద! రాధ మదనబాధ \| బళిర కఱివేల్ప! పసిఁడిదువ్వలువదాల్ప!	15
సీ.	మొలకనవ్వులఁ దాల్మి మూలల కొదిగించి, \| మోముతేఁటలఁ గోర్కి మొలవఁజేసి, చక్కెరకెమ్మోవి గ్రుక్కిళ్లు కొల్పించి \| కడకంటిచూపులఁ గళలు రేచి, తెలినునుకొనగోళ్ల గిలిగింత లొదవించి, \| తొడబెడంగుల గగుర్పొడువఁజేసి, రాణించు నెద నెమ్మె రవిక కప్పుల మార్చి, \| యొయ్యారమున నూర్పు లుడుగఁజేసి,
గీ.	చెలఁగు నీ చెల్వు చీకాకు చేసి రాధ \| సిగ్గుఁగొని జవ్వనము లూటిచేసెఁ గాక, దోసమా యింతి చేసిన దుడుకదేమి? \| బళిర కఱివేల్ప! పసిఁడిదువ్వలువదాల్ప!	16
సీ.	ముసురుచుఁ జిక్కించు మొకరితుమ్మెదలకై \| ముచ్చటై మోమెత్తి మురియ వెఱచు, పొగరానుకొని వచ్చు తగరుకోయిలలకై \| వేడుకైనను మోవి విప్ప వెఱచు, పదరుచు నేతెంచు కొదమచిల్కలకునై \| హవుసైన మాఱుమాటాడ వెఱచు, పగ చాటుకొని వచ్చు వెగటుజక్కువలకై \| మనసైన గుబ్బ లేమఱఁగ వెఱచు,
గీ.	ప్రౌఢయయ్యును దన ముగ్ధభావ మేర్ప- \| డ, మెలఁగెఁ గదర యమునాతటంబు పొంత నొదవు వలవంత రాధ నిన్ వెదకునంత \| బళిర కఱివేల్ప! పసిఁడిదువ్వలువదాల్ప!	17
సీ.	ముద్దీయ కటు మాఱుమోము సేయుటె కాని, \| యలరుఁజెక్కుల గగు ర్పణచలేదు, కౌఁగిలీయక యోరఁ గైకొంటయే కాని, \| పదుటు గుబ్బల యుబ్బుఁ బట్టలేదు, తేఱి చూడక చూడ్కి ద్రిప్పివైచుటె కాని, \| యిఱ్ఱింకు కనుఁగ్రేవఁ నిముడలేదు, కలయికీయక తొడల్ గదియించుటే కాని, \| నీవి జల్లని వీడ నిల్పలేదు,
గీ.	కినుకఁ గొననేర్చి తమి దాఁచుకొనఁగ నేర \| దకటకట! నీపైని యాపరాని మోహమిరువెంద నెయ్యంపు మోడియందు \| బళిర కఱివేల్ప! పసిఁడిదువ్వలువదాల్ప!	18
సీ.	తొడరు రేజోతి చేఁతులకాఁక వడఁదాఁక \| కలువపూటరిగెలఁ గ్రమ్మిక్రమ్మి, పయిఁగ్రమ్ము పువుదుమ్ముఁ బాయననంటి లేఁ- \| దలిరుపేటురుమాళ్లఁ దరిమితరిమి, శుకపికాదుల పల్కులకు నుల్కుఁగొన కమ్మ- \| వీనుల నంగుళు లానియాని, చలిగాలి యుడుకుసోఁకుల ఢాకకై సారె \| దట్టంపుటీరాలఁ దార్చితార్చి,
గీ.	అమ్మచెల్లంచు నిరుగడ నలమికొంచుఁ \| దోడఁ జనుచుండు నుడిగంపుఁ జేడెపిండు విరిపొదలలోను రాధ నిన్ వెదుకఁగాను \| బళిర కఱివేల్ప! పసిఁడిదువ్వలువదాల్ప!	19
సీ.	మునమున నడపించు ననతేనెగాసమ్ము \| నెలగోలునకు మూల లీఁగలేక, యా వెంటఁ దారసంబగు కల్వదొర కేలు \| గమిచివ్వ గరబారుఁ గదియలేక, ఆ పిఱుందున పువ్వుటందంబుపై వచ్చు \| బేడిసడాల్ దేఱి చూడలేక, ఆ పైని పచ్చతేజీపౌజు కాల్మట్ల \| నడరుపుప్పొడికోర లానలేక,
గీ.	ఓడి యొడిచేతు లిడికొనియుండుఁ గాని, \| హవుసునకునైన నీపైని యలుకఁబూన దతనుజయధాటి మది నాటి యా వధూటి \| బళిర కఱివేల్ప! పసిఁడిదువ్వలువదాల్ప!	20
సీ.	చెక్కిటఁ జెయిచెంద సెకచింద వాతెర \| గందనిట్టూర్పు లందందఁ బర్వ, ననుఁగునెచ్చెలులందఱును మది గుంద చ- \| క్కనిమేను వెన్నెల గాసిఁ బొంద, తాలిమి డింద డెందమునఁ గొందలమొందఁ \| గెందలిరుల పాన్పునందుఁ జేరి, యసురుసురంచు మోమరవంచు విధినెంచు \| నశ్రులునించు లో నలమటించుఁ,
గీ.	గదర నినుఁ బాసి యా రాధ కమ్మవిల్తు \| మాయ యనఁబోలి యంతైనఁ జేయు జోలి నడరు మది జాలి జవరాలి కా విరాళి \| బళిర కఱివేల్ప! పసిఁడిదువ్వలువదాల్ప!	21
సీ.	తల చూపనీయక తఱుము తుమ్మెదలకు \| లపన పంకజరుచి లంచమిచ్చి, వాయెత్తనీయక డాయు రాచిల్కల \| కధరబింబద్యుతు లాసగొలిపి, ఎలుఁగెత్తనీయక యేఁచు కోయిలలకు \| కరపల్లవచ్ఛాయ కాన్కలొసఁగి, చనుకప్పుఁ దొలఁగ పైకొను జక్కవల యొద్ద \| కనుమీల డాలు తాకట్టు పెట్టి,
గీ.	కడఁగి యిబ్భంగి నేర్పునఁ గన్మొఱంగి, \| డాగు నొకచెంత యమునాతటంబు పొంత, నొదవు వలవంత రాధ నిన్ వెదకునంత \| బళిర కఱివేల్ప! పసిఁడిదువ్వలువదాల్ప!	22
సీ.	కళుకులూఱఁగఁ జాలు కమ్మపౌజుల డాలు \| వాలుచూపులకు నివాళులీయ, పుక్కిటి నెత్తావిఁ బొల్చు వీడెపుఁ గావి \| మోవికెంపునకుఁ జేమోడ్పులిడఁగ, జిగికడానిమెఱుంగు చీరకుచ్చు చెఱంగు \| తొడబెడంగులకుఁ బావడలు వీవ, పదములఁ దళ్కొత్తు పదనులత్తుక జొత్తు \| మీఁగాళ్లరుచికిఁ గైలాగొసంగ,
గీ.	రాజసంబున నీరీతిఁ దేజరిల్లు \| పొలుపు గని రాధప్రాయంబుఁ బొత్తిగాను గుత్తకొంటివిదేమిరా! యత్త యనక \| బళిర కఱివేల్ప! పసిఁడిదువ్వలువదాల్ప!	23
సీ.	కరికుంభమధ్యసంఘటిత నీలాంజనం \| బనఁ గుచంబుల నూఁగుటారు మెఱయ, కాలాహిమణిఫణాగతివేణి మొదలంటి \| ఠీవి కెంపులరాఁకడీ చెలంగ, తన డాలు నిరసించు కనుమీలఁ బట్టఁ ద- \| లంచి, కచయము నా లహరి ముంచి, మీనాంకుఁ డేసిన మేలుజాలంబనఁ \| జేరుపాఁపటబొట్టు చెలువ మమర,
గీ.	రాజసంబున నీరీతిఁ దేజరిల్లు \| పొలుపుఁ గని రాధప్రాయంబు బొత్తిగాను గుత్తకొంటివిదేమిరా! యత్తయనక \| బళిర కఱివేల్ప! పసిఁడిదువ్వలువదాల్ప!	24
సీ.	పావడఁ బాసి కన్పడు తొడనిగ్గుతో \| వగఁజూపు కుఱుమాపు వలువతోడ, సేస లిట్టట్టుగాఁ జెదరు ముంగురులతో \| వసివాడు నెమ్మోము మిసిమితోడ, పలునొక్కు లెడఁబడ్డ పలుచని మోవితో \| సోగకన్నులఁ గల్గు సొలపుతోడ, నూఱట చెందిన యుదుటు చన్మొనలతో \| రహి గట్టిముడివడ్డ రవికతోడ,
గీ.	చెఱుఁగు మాసిన దినములఁ జెలఁగు రాధ \| సోయగము నిన్నుఁ దరితీపు సేయుగదర! నిముస మొకయేఁడుగాఁ బోలి నిగుడఁజాలి \| బళిర కఱివేల్ప! పసిఁడిదువ్వలువదాల్ప!	25
సీ.	రహి నూనెమెఱుఁగాని రాణించు వేణితో \| సొలపుచూపుల తళత్తళలతోడ, పసుపాని పసఁబూని యెసఁగు నెమ్మేనితో \| దళుకుఁజెక్కుల ధగద్ధగలతోడ, సిరిమించు సరిగంచు చీరకుచ్చెలలతో \| దళుకుటందెల ఝళంఝళలతోడఁ గడలందుఁ గడలొందు కక్షదీధితులతో \| బొగరుగుబ్బల నిగన్నిగలతోడ,
గీ.	తేటపాటీల నాలవనాట నీటుఁ \| జెందు రాధావధూటి కే చేటి సాటి వ్రతము చెడ్డను సుఖము చేపడెను గదర \| బళిర కఱివేల్ప! పసిఁడిదువ్వలువదాల్ప!	26
సీ.	దట్టంపుఁ గౌగిళ్లఁ దగ్గుడుమొగ్గుడుల్ \| కుల్కుగుబ్బల యుబ్బుఁ గొంచెపఱ నుదుటు చక్కిలిగింత యుక్కిరిబిక్కిరి \| యెడనెడ మరుసివం బెచ్చరింప చికిలి నున్గొనగోళ్ళ చిందఱవందఱల్ \| అందందుఁ జిందఱ లొందచెంద నాపోని దప్పికి యక్కఱగిక్కఱల్ \| గెడపి కెమ్మోవి సొక్కిళ్లు వోవఁ
గీ.	గూకికవరవ కెఱలి యాగుబ్బు గాఁగఁ \| దనరు నాలననాటి రాధావధూటి కూటమిఁ దలంప నదరెనో గుండె నీకు \| బళిర కఱివేల్ప! పసిఁడిదువ్వలువదాల్ప!	27
సీ.	ఈలువు నీలమ్ము లెసఁగు సోరణగండ్ల \| నొకచాయ నెలచాయ లొఱపుఁ జేయ కొణిగలఁ దళుకొందు కుందనంబుల గూళ్ళ \| నొకదారి బకదారి యుద్దిసలుప రాణ రంజిలు నపరంజిపంజరముల \| నొకనంక గొరువంక లుబుసుపుచ్చ గీల్బొమ్మ కైతమ్మిఁ గెరలు పూసురకటిగా- \| డ్పొకయోర సెకదీఱ నూఱడింప
గీ.	పసిఁడిక్రోవులఁ బన్నీరు ముసురుకొనఁగ \| రాధతోఁ గూడ జాబిల్లిరాలమేడ వేసవులు సల్పవే క్రీడ వేడ్కతోడ \| బళిర కఱివేల్ప! పసిఁడిదువ్వలువదాల్ప!	28
సీ.	కలకంఠి నునువాలు కనుబెళ్కులకుఁ దోడు \| సోరణగండ్ల మించులు చలింప చెలికొప్పుపై నుప్పతిలు కప్పునకుఁ దోడు \| చూఱుపట్టెల మొయిల్ చుట్టుకొనఁగ మగువ కుత్తుకఁబల్కు మణితంబులకుఁ దోడు \| రహిమించు నురుముల రవమెసంగఁ బూఁబోఁడి చెలువంపు బొమవంపులకుఁ దోడు \| తెఱగంటి దొరవింటి తెఱుఁగులంట
గీ.	గగన మేవేళ నల పచ్చికడవ లీలం \| బఱఁగు జడివాన నీకు నుప్పరిగెలోన నొదవె నా రాధతో జోక నుబుసువోక \| బళిర కఱివేల్ప! పసిఁడిదువ్వలువదాల్ప!	29
సీ.	బవిరి దీరిచిన యన్నువ గవాక్షుల వెంట \| నొదవు సాంబ్రాణిధూపోష్మ వలన కలయఁబర్వెడు నవ్యకస్తూరికాఘుటి- \| కామిళద్దీపికాఘర్మకలన నెయ్యంపుటలుకల నిగుడిపుక్కిళ్ళను \| వెడలు నిట్టూర్పుగోర్వెచ్చ వలన సరస మేర్పడు బాహ్యసురతశ్రమంబునఁ \| బొడము నెమ్మేనుల పొగరువెట్ట
గీ.	నెట్లు చలిదీఱునబ్బ నీ కిఱుకుగుబ్బ \| గుబ్బలుల నుబ్బతిలు నుబ్బ యబ్బకున్న మిన్నయగు రాధ కౌఁగిటి మిద్దెయింట \| బళిర కఱివేల్ప! పసిఁడిదువ్వలువదాల్ప!	30
సీ.	మూఁపునఁ గేలూది మురియుచుఁ గూర్చున్న \| తరిగుబ్బ గోరొత్తఁ దగ్గుజగ్గు బలిమిఁ బైపడి మోవి బలునాటఁ గిలకిల \| నగుచు నావలిమొగంబగు హొరంగు మగలాగు సల్ప నెమ్మొగము తప్పక చూడ \| వాలుగన్నులు దేలవైచు బాగు కలియకు మలసి చక్కనిసామి నన్నిఁక \| గాసిచేయకుమను కనికరంబుఁ
గీ.	దలఁచినను గుండె జల్లని జలదరింప \| నెట్టులోర్చితొ దెలియదీ వెట్టిదిట్ట- వైన నా రాధ చెయ్వు లిట్టట్టుసేయు \| బళిర కఱివేల్ప! పసిఁడిదువ్వలువదాల్ప!	31
సీ.	అలరువాతెఱ పంటి కందిచ్చి యోరయై \| కడలు గన్పట్టు క్రేఁగంటిచూపు మరుకేళి గవయు నత్తఱి తొడల్ గదియించి \| పైకెక్కుటకు హౌసుపఱచు నొఱపు మగలాగు సల్ప ముందుగ నీవు గడఁగిన \| తఱిఁ జూపులను దెల్పు దైన్యవృత్తి కలయక గిలిగింత గ్రమ్మ ఱొమ్మునఁ జేరి \| ‘కదలించకుర’ యంచుఁ బదరు ఱంతుఁ
గీ.	దలఁచినను గుండె జల్లని జలదరింప \| నెట్టులోర్చితొ తెలియదీ వెట్టిదిట్ట- వైన నా రాధ చెయ్వు లిట్టట్టుసేయు \| బళిర కఱివేల్ప! పసిఁడిదువ్వలువదాల్ప!	32
సీ.	గంధసారముఁ బూయు కరణి చెక్కులురుండ \| లాబలాకొనెడు చెల్వంపు వగలు నుపరతి నీరీతి నొదవింతు చెమ్మట \| లను మాడ్కి బన్నీరు నినుచు బాకు కైచేసి రతిఁ జొక్కు గడిమించి గన్నారఁ \| గనక ఱెప్పలు వ్రాల్చుకొనెడు వెరవు తొడ తలాడగ నున్నయెడ మంతనముఁ దెల్ప \| తగ్గి మోమున మోముఁ దార్చు నేర్పు
గీ.	తలఁచినను గుండె జల్లని జలదరింప \| నెట్టులోర్చితొ తెలియదీ వెట్టిదిట్ట- వైన నా రాధ చెయ్వు లిట్టట్టుసేయు \| బళిర కఱివేల్ప! పసిఁడిదువ్వలువదాల్ప!	33
సీ.	ముద్దిచ్చుతఱి చెక్కుటద్దంబు మోవివై \| గదియించి యరచొక్కుఁ గాంచు సొబగు పెదవిపైఁ బలుకెంపు లొదవింప సీత్కృతి \| నించి కన్బొమదోయి వంచు సొంపు పిఱిఁదిఁ గూర్చుండి పెన్నెఱులు దువ్వుచుఁ బొగ- \| రడఁగ చన్మొనల వెన్నదుము హొయలు కలయఁగ నీ జడఁ గట్టివైతునటన్న \| ఠీవి పెన్నెఱులు జాచుకోపు
గీ.	తలఁచినను గుండె జల్లని జలదరింప \| నెట్టులోర్చితొ తెలియదీ వెట్టిదిట్ట- వైన నా రాధ చెయ్వు లిట్టట్టుసేయు \| బళిర కఱివేల్ప! పసిఁడిదువ్వలువదాల్ప!	34
సీ.	తమి పోకముడి ఱొమ్ము దగులుచు నోరయై \| యొడికట్టు చేమాటు నువిద నీటు బాహ్య కేళీకలాపరిపాకయై రతి- \| కాంక్ష చూపులఁ దెల్పు కల్కి సొలపు నంకపర్యంకశయనసమయోపకం- \| ఠశశికాంతచషకాంతరపటీర- పంకంబునకు నిగ్గి పైకి నించుక మ్రొగ్గి \| చన్మొన లెదఁ దార్చు సఖియ నేర్పు
గీ.	తలఁచినను గుండె జల్లని జలదరింప \| నెట్టులోర్చితొ చెలియదీ వెట్టిదిట్ట- వైన నా రాధ చెయ్వు లిట్టట్టుసేయు \| బళిర కఱివేల్ప! పసిఁడిదువ్వలువదాల్ప!	35
సీ.	పిఱుఁదుగుట్టు బయటఁబెట్టు వల్పెంబు గ- \| ట్టి బిగువురవి దొడిఁగి పొడవగు నిండుజరీచెట్ల నీటుపైఁటచెఱంగు \| నేటవాలుగ మొలనిడి కుదురుగ చేర్చుక్క నించి పసిడిగాజులు బిగించి \| యందెలు మొఱయంగ సందిదండ- లు చలింప నెన్నుదురు చెమర్ప వగ వెల- \| ర్పఁ గవును నులియంగ వగ చెలంగ
గీ.	కులుకుచుఁ గడాని చిమ్మనఁగ్రోవిఁ బూని \| నిగ్గు వెదచల్ల గుంకుమనీరు చల్ల నెదురుకొని వచ్చు రాధ చెల్వెన్నఁ దరమె \| బళిర కఱివేల్ప! పసిఁడిదువ్వలువదాల్ప!	36
సీ.	బరణికప్పుల లక్క భాసిల్లు విధమున \| గబ్బిగుబ్బలు కంచుకమునఁ దనర నిసుకదిన్నియలపై నెసఁగు నీరెండ కై- \| వడి నితంబమునంటి వలువ సెలఁగ తుమ్మెదచాలుపైఁ దొఱఁగు పుప్పొడి రీతి \| నూగారుపైఁ బైట బాగుమీఱఁ బొండమ్ములందుఁ గెంపులు నింపినటువలెఁ \| బదములఁ గుచ్చిళ్లు గుది నటింప
గీ.	నెమ్మి చెల రేగి కుంకుమనీటఁ దోఁగి \| యలఁత లెడలించు జలకేళి కఱుగుదెంచు రాధ వగఁ గన్న మది నిల్పరాదురన్న \| బళిర కఱివేల్ప! పసిఁడిదువ్వలువదాల్ప!	37
సీ.	రాణించు నెఱజంటరవికపట్టీ నంటి \| ముత్తరుల్ దొంతరై బిత్తరింప జిగికుసుంబావన్నె చీరకుచ్చెల చెఱం- \| గంచు లంచలకచ్చు లచ్చుపడఁగ కుదురులై యెద నిండుకొనెడు గుత్తపుగుబ్బ \| లుబ్బి క్రేవకుఁ బైట నొత్తగింప విరులు జల్లున రాల వేనలి యిట్టట్టు \| చలియించి మెఱుఁగుచెక్కులకు డిగ్గ
గీ.	నందియలు మ్రోయ వేఁడుక లలరఁజేయ \| బడలికలు పాయ చెలులు పావడలు వేయ కడఁగి నీతోడఁ జెండ్లాడు గదర రాధ \| బళిర కఱివేల్ప! పసిఁడిదువ్వలువదాల్ప!	38
సీ.	చెక్కుఁ జెక్కునఁ జేర్చి చెయి ప్రక్క మఱలించి \| గుబ్బలు ఱొమ్మున గూరిచి తొడ- పైనిఁ జేర్చి యలసి పవళించునెడ నీవు \| చిటిపొటిసేతలఁ జెలఁగుచున్న నించుక సిగ్గు నొకించుక జగ్గించు- \| క సొలపు నొక్కించుక జలు పించు- క యులుకు నొక్కించుక కులు కించుక యుసీ- \| త్కృతి యొకించుక హుంకృతి చెలంగ
గీ.	నలరుఁ జెక్కుల లేనగ వంకురింప \| నెట్టకేలకు కనుఱెప్పలెత్తి చూచు రాధ వగఁ గన్న మది నిల్పరాదురన్న \| బళిర కఱివేల్ప! పసిఁడిదువ్వలువదాల్ప!	39
సీ.	ఒక మూఁపుపై రుమా లొకమూఁపుపై సరా- \| లరజార నలరారు హవుసుమీఱఁ గేల్తలాడఁగ నొత్తిగిలి తొడల్చేర్పుల \| జిలిబిలిపలుకులు గులుక చేయి మార్పులఁ బొదవి కోల్‍మడుపు నొక్కునెడ కె- \| మ్మోవులఁ దగులు పల్‍మొన చుఱుకుల కులుకుచు సీత్కృతు ల్వెలయించుచును గిలా- \| ర్చుచుఁ గికాకిక నగుచు నొకరినొక-
గీ.	రూరడింపుచుఁ గదియుచు నోసరిలుచు \| నొద్దికలు మీఱి, బకదారియుద్దిఁ గేరి, యలరినావయ్య రాధతో నలరుశయ్య \| బళిర కఱివేల్ప! పసిఁడిదువ్వలువదాల్ప!	40
సీ.	ఆ రాధ వెతల చల్లార్పుల, వేడ్కనో \| లార్పుల, రెప్పలల్లార్పుల, నగ- వు కిలార్పుల, జెమటార్పుల, నెద సేదదే- \| ర్పులఁ, గలయికల నేర్పుల, తొడదొడఁ దార్పుల, మెయిమెయిఁ జేర్పుల, మోవిమా- \| ర్పుల, మోడి తీర్పులఁ, బులుపులు గొలు- పు తలఁపు, వలపువిల్బూనువాని కలన \| సంధింపఁగాఁ జేసె నకట! నీకు
గీ.	వేగిరంబెంత? వెఱఁగెంత వేసటెంత? \| వెల్లఁబాటెంత? వెగటెంత, వేఁగుటెంత? యువిద నొకయింత యెడబాసి యున్నయంత \| బళిర కఱివేల్ప! పసిఁడిదువ్వలువదాల్ప!	41
సీ.	తఱిఁజూచి జుంటివాతెఱఁ జుఱుక్కునఁ బంటి- \| మొనఁ బట్టి గంటుసేయనె తలంచు, నబ్బినప్పుడె చేత నల్లనఁ జెక్కుపైఁ \| గొట్టి కోర్కిని ముద్దుఁగొనఁగఁ దలఁచు, దక్కినంతనె తాఁ జివుక్కునఁ బైకొని, \| కఱఁగి హా యని సొక్కఁగను దలంచు, ననువనైనయెడ ఖచిక్కున చన్మొనల ఱొమ్ము \| గ్రుమ్మి, కౌఁగిటఁ జేర్చుకొనఁగఁ దలఁచు
గీ.	గదర, నినుఁ జూచి యా రాధ కంతుబాధఁ \| బలుకు వినువేళ సాము చొప్పడెడువేళ మంతనమువేళ ప్రక్క మార్మలయువేళ \| బళిర కఱివేల్ప! పసిఁడిదువ్వలువదాల్ప!	42
సీ.	తమకించి యధరామృతంబుఁ గ్రోలఁ గడంగ \| నెమ్మొగం బటుసేయు నెపముఁబూని యధరంబునకు నడ్డమగు నత్తుముత్తెంబు \| నోరఁ గావించెడు హొయలు దలఁచి దుడుకుఁగా గుబ్బచన్నొడయఁగాఁ గమకింప \| నోసరిల్లెడులీల నొక్కకేల రవిక ముడి సడల్చు రహిఁ దలంచి నిగుడి \| చెక్కిలి ముద్దాడ సిగ్గుఁ గదిరి
గీ.	వదన మరవంచుకొను రీతి వదలి చెక్కు \| లలముకొను కొప్పు సవరించు చెలువుఁ దలఁచి మఱతువే యిందుముఖి పొందు మనమునందు \| బళిర కఱివేల్ప! పసిఁడిదువ్వలువదాల్ప!	43
సీ.	ననుఁ జెందు జనులందు నెనరొందు ననుకొందు \| వదియెల్ల కల్లసు మ్మరసిచూడ నలనాఁడు మధురకీ వరిగెడుపైనంపు \| గుసగుసల కదరు గుండెతో గ- దురునూరుపులతోఁ జెదరు ముంగురులతో ను- \| దురునఁ గ్రొంజెమటలతో నిలిచిన మ్రొక్కి గ్రక్కున నొక ముద్దిచ్చి సెలవియ్య- \| వే! యని వేఁడుచు నెదను జేర్ప
గీ.	నమ్ముకొని నీకుఁ జనుదోయినిమ్మపండ్లు \| కాన్కగా నిచ్చి సెలవిచ్చి కడఁక ననుప నరిగి కలనైనఁ దలపోయవైతి రాధ \| బళిర కఱివేల్ప! పసిఁడిదువ్వలువదాల్ప!	44
సీ.	అందెలు మొఱయంగ నతనుపట్టపుదంతి \| పగిది రాఁ గని నీవు పవ్వళించి యట్టురా నిట్టురా నటుమోమయినఁ జూచి \| తలయూచి యశ్రులు దలకొనంగ నిట్టూర్పు నిగిడించి కట్టల్క వలకేలి \| సందిదండ చలింపఁ గుందనంపు గాజులు రొదలీనఁ గ్రక్కునఁ బ్రక్కఁ గ్రొ- \| మ్మెఱుఁగు సోగ జరాన నొఱ వెడలుట
గీ.	పోలఁ జన్మొన నానుకోఁబోవ నుఱుక \| నొడిసి చేఁబట్టుకొని రాధ నూఱడించి తరయ వెఱపింపఁబోయి తా వెఱచునట్లు \| బళిర కఱివేల్ప! పసిఁడిదువ్వలువదాల్ప!	45
సీ.	మాటికిఁ జెలియిచ్చు మడుపులఁ గైకుంద- \| నంపుగాజుల నిగ్గు సొంపునింపఁ జెలికత్తె కైదండఁ జెలఁగు దాఁపలి కేలి \| రతనంపుటుంగరా ల్రంగులీన హొయలౌ ననుచు నెచ్చెలి “యెలా బలే”యన \| ముఱిపంపుటెలనవ్వు మొలకలెత్త సఖులకు సెలవీయ జడబెడం గడరంగ \| పెడమర్లు హొయలు పింపిళ్లుగూయ
గీ.	సరుల మెలిఁదీర్చి పయ్యెదఁ జక్కఁజేర్చి \| సిరులఁ గడుహెచ్చు పడకిల్లు చేరవచ్చు రాధ వగఁ గన్న మది నిల్పరాదురన్న \| బళిర కఱివేల్ప! పసిఁడిదువ్వలువదాల్ప!	46
సీ.	మూఁపున జారు క్రొమ్ముడిలోని చెక్కిలి \| కళకు హొంబట్టు మేల్గట్టు గాఁగఁ, బిఱుదఁ జేర్చిన కేల మిఱుమిట్లు కొనుగోళ్ల \| తెలినిగ్గు సేసముత్తెములు గాఁగ, పుటముబ్బి ఱవికెకకప్పుల గుబ్బతిలు గబ్బి- \| గుబ్బచన్నులు పూర్ణకుంభములుగఁ, గడలకై త్రిప్పు క్రేఁగంటిచూపుల బెళ్కు \| వలపుఁ గప్రంపు నివాళి గాఁగ,
గీ.	వచ్చి నీరాకకై దరవాజతలుపు \| క్రేవ ఠీవిని నిల్చి రాధావధూటి యెదురెదురుఁ జూచు మదిఁ గోరి యెమ్మె మీఱి \| బళిర కఱివేల్ప! పసిఁడిదువ్వలువదాల్ప!	47
సీ.	కుచ్చులు దువుముడిగొని వ్రేలు మేల్జరీ- \| త్రాళ్లఁ జెలంగు బుర్సామెఱుంగు- కుచ్చుల తొడ బెడంగుఁ గడవ మొలఁ జెక్కి- \| న పసిఁడివ్రాతపని పయిఁటచెఱఁ- గించుక జీరాడ నింపొసఁగ కొనవం- \| కలెసఁగు నసదు చెంగావిచెట్ల పావడ జిగిచీరపై దువాళింప నం- \| దెల రవరవ దౌదవుల చెవుల
గీ.	చవులు దవులఁ, గల్వలదొరచట్లమెట్ల \| వెంబడిగ రాధ కేళిసౌధంబుఁ జేర వచ్చు చెలు వచ్చుపడ నోర్వవశమె నీకు \| బళిర కఱివేల్ప! పసిఁడిదువ్వలువదాల్ప!	48
సీ.	మేఘంబుఁ గదిసి క్రొమ్మెఱుఁగు తళుక్కను \| లీల నీలపుకిటికీల మ్రోల నిలిచి నెచ్చెలులకు సెలవొసంగెడువేళ \| నోరగా దిండుపై నొత్తిగిల్లి చెలినోర్తు మదిఁ గూర్చి చెక్కిటఁ జే చేర్చి \| చింతింపుచుఁ బరాకుసేయు నిన్ను గని, మును తన్నంతటనె చూచిరావె నా \| ప్రాణేశ్వరీ! యంచుఁ బారఁజాపు
గీ.	చెలువుఁ డిదియేమొ యంచు నెచ్చెలుల నొక్క- \| కంట నిన్నొక్కకంటను గాంచు రాధ చూపు మరుతూపులకుఁ బ్రాపుఁ జూపుఁ గదర \| బళిర కఱివేల్ప! పసిఁడిదువ్వలువదాల్ప!	49
సీ.	చెదరు కస్తురిబొట్టు కుదురు కొల్పెడునట్లు \| మొగమెత్తి మోమున మోముఁ జేర్చి, కెలన నున్నంత దిక్కులు పరికించి చె- \| క్కుచెమటఁ గొనగోటఁ గొని విదిర్చి, యెటకేని చనుచు నొక్కించుక వెడమళ్లి \| సోకిసోకమిఁ బైటఁ దాకఁజేసి, యలుకఁ బల్కమిఁ బల్మొనల పెదవి మడచి \| కీల్జడఁ బూని హుంకృతి నదల్చి,
గీ.	యిచ్చనిచ్చలు నీరీతి పెచ్చుపెఱుఁగు \| దుడుకుసేతల రాధావధూటి నీకు నించువిలుకాని యెలగోలు సంచుఁ దెలిపె \| బళిర కఱివేల్ప! పసిఁడిదువ్వలువదాల్ప!	50
సీ.	ఎదురైనచో దారి కిట్టట్టు దొలఁగక \| ఉదుటు చన్మొన లెద నదిమి గదిమి, చేర రమ్మని కాసెచెర గుగ్గుఁ దీర్చు కై- \| వడి వాఁడికొనగోరు తొడఁ దనర్చి, మునిపంట మడుపందుకొనుమంచుఁ గదిసి వా \| తెర సోకఁ బల్మొన చుఱుకులుంచి, దరినున్న తరిని మైవిఱుపు వీలుగఁ గేలు- \| గవ మూఁపునకుఁ జేర్చి కౌగిలించి,
గీ.	యిచ్చనిచ్చలు నీరీతి పెచ్చుపెఱుఁగు \| దుడుకుసేతల రాధావధూటి నీకు నించువిలుకాని యెలగోలు సంచుఁ దెలిపె \| బళిర కఱివేల్ప! పసిఁడిదువ్వలువదాల్ప!	51
సీ.	ఒకవేళ దోర్మూల చకచక ల్విలసిల్ల \| విరులవీవనఁ బూని విసరి విసరి, యొకవేళ సందిటి పికిలిచెం డ్లల్లాడ \| నలరునూనియఁ దల నంటి యంటి, యొకవేళఁ గొనగోళ్ల చికిలిడా ల్తిలకింప \| దులకింపఁ బెన్నెరుల్ దువ్వి దువ్వి, యొకవేళఁ గరతలద్యుతులు పేరెమువాఱ \| నిచ్చగా మడుపు లందిచ్చి యిచ్చి,
గీ.	నిచ్చనిచ్చలు నీరీతి నీకుఁ దనదు \| చెలువు దీపింప నుడిగంబు సేయుఁ గదర! తోరమగు ప్రేమ రాధావధూలలామ \| బళిర కఱివేల్ప! పసిఁడిదువ్వలువదాల్ప!	52
సీ.	మొకరి తుమ్మెద మూఁతి ముట్టని క్రొవ్విరి \| కోయిల వాచవిఁ గొనని చివురు చిలుకముక్కున నొక్కు చెందని బింబంబు \| మెఱసిపోవక నిల్చు మెఱుఁగుఁదీవ కసటువోఁ బన్నీటఁ గడిగిన జవ్వాది \| చొక్కమౌ గోవకస్తురి బిడారు, కలికిరాయంచ క్రేగంటఁ జూడని తూఁడు \| పైపొర విడని కప్రంపుటనఁటి,
గీ.	చిత్తజు మిటారి గేదఁగిచిక్కటారి \| కమ్మవిలుకానిజుల్మతీ కత్తలాని కాయజోపనిషద్గాథ కదర రాధ \| బళిర కఱివేల్ప! పసిఁడిదువ్వలువదాల్ప!	53
సీ.	నెఱిలేక యొకవేళ నీటుగా నిలుచున్న \| మడుఁగుగడంగు నున్దొడ బెడంగు సొమ్ములే కొకవేళ నెమ్మెమై నిలుచున్న \| మిసిమిఁ జెలంగు నెమ్మెయి వెలుంగు ఱవికలే కొకవేళ హవుసుగా నిలుచున్న \| పయ్యెదఁ బొంగు గుబ్బల మెఱుంగు ముడికొల్ప కొకవేళఁ దడియార్ప నిలుచున్న \| పిఱుఁద నెసంగు పెన్నెఱుల రంగు
గీ.	తన తళతళలఁ దన ధగధగలఁ దన ని- \| గనిగలఁ దన చకచకలఁ గదిసి యిట్లు వెత గొలిపె రాధ యవయవద్యుతుల నిన్ను \| బళిర కఱివేల్ప! పసిఁడిదువ్వలువదాల్ప!	54
సీ.	వలసినయెడల నవాతు వాతెర మోపి, \| వదలు కౌగిళ్లను బొదలి పొదలి, నునుమోవి సోకిసోకని పల్చుఱుకు నించి, \| యసివోవఁ గొనగోట నంటి యంటి, తొడలు పైఁ గదియించి తోడుపా టొనరించి, \| సేదదీఱుట కెదఁ జేర్చి చేర్చి, యలసినవేళ మీఁదై చుల్కగాఁ గూడి, \| చిటిపొటి గిలిగింత చేసి చేసి,
గీ.	యిచ్చనిచ్చలు నీరీతిఁ బెచ్చుపెఱుఁగు \| మచ్చికలు చేసి పచ్చహుమావజీరు కలన నినుఁ దీటుకొలిపెను గదర రాధ \| బళిర కఱివేల్ప! పసిఁడిదువ్వలువదాల్ప!	55
సీ.	కులుకు సిబ్బెపు గబ్బిగుబ్బ లుబ్బడగ మైఁ \| జేర్చి కూకీరవాల్ సెప్పి సెప్పి, కుందనపుం జాయ గొనబూను తొడ లవి \| నొవ్వఁ గేలను బట్టి నులిమి నులిమి, కొదకెడు తఱిఁ గాంచి పెదవిచక్కెరముక్క \| మచ్చికలొప్ప నందిచ్చి యిచ్చి, గడియసేపుకుఁ గాఁచి కదియరాఁ దలయూఁచి \| చూపు జంకెనవాడిఁ జూపి చూపి,
గీ.	యెసఁగు జడవేట్లఁ జదువున కియ్యకొలిపి, \| శిక్ష గావించె మరువిద్యఁ జిన్ననాఁడు దేవరకుఁ గూర్మితోడ రాధావధూటి \| బళిర కఱివేల్ప! పసిఁడిదువ్వలువదాల్ప!	56
సీ.	కలికి నెమ్మెయి సాముకంబంబుఁ బెనఁగించి, \| మోవిమార్పుల వెన్క మొగ్గు నిల్పి, కలయికఁ దారుమారుల డింకిఁ దొలఁగించి, \| మిసిమి నున్దొడలఁ గొక్కెస ఘటించి, కొనగోటఁ జిక్కటా ర్మొనవైరిఁ గావించి, \| పొలయల్క మార్మోము తొలఁగఁ దెలిపి, రాణించు కీల్జడ రాణావిసరుఁ జూపి, \| చక్కిలిగింత హెచ్చరికఁ దెలిపి,
గీ.	యెదను గుబ్బలకుంకుమ యెఱ్ఱమట్టి \| నిలిపి తన చెల్వుగరిడిలో నీకు మరుని- సాము గఱపిన బిరుదువస్తాదు రాధ \| బళిర కఱివేల్ప! పసిఁడిదువ్వలువదాల్ప!	57
సీ.	ప్రక్కమో మటుచేసి పవళింపఁ దొడనాని, \| యిటుమొగం బగుమని యెచ్చరించి, తనమొగంబుగఁ జేసికొని గ్రుచ్చి కౌగిటఁ \| గదియించి పలుకెంపుఁ బెదవి నుంచి, యుద్దిలో మీఁదగు గద్దరిపికిలి కై- \| వడి డింకికొను పారువంబు కరణిఁ, బైఁ దొర్లి పేరెదఁ బవళించి ఱొమ్ముల \| పొగరడంగఁగఁ గసిపోక లేచి,
గీ.	కొప్పు సవరించి, చేర్చుక్క కుదుర నించి, \| సరులు మఱలించి, మగలాగు సలుపు రాధ హొయలుఁ దలపోసి నీ వెటులోర్తు వహహ \| బళిర కఱివేల్ప! పసిఁడిదువ్వలువదాల్ప!	58
సీ.	ననఁబోడి పొ త్తది తనరక భుజియింప \| నొల్లవుగా యొంటి నోగిరంబు పైదలి నునుదొడపైనఁ జేర్చినఁ గాని \| రాదుగా కంటికి రాత్రి నిదుర బాల యందెలరవ మాలకించినఁ గాని \| యాపఁజాలవు గుండె యదురుపాటు నలివేణి మునిపంట నందియిచ్చినఁ గాని \| యందుకో లేవుగా యాకుమడుపు
గీ.	గాటమగు ప్రేమ మది నాఁడు నాటఁ బట్టి \| నెట్టుకొని యల్ల రాధపైఁ బుట్టె నిట్టి మమత, నేఁ జెల్ల! తన చెల్వు మచ్చుఁ జల్ల \| బళిర కఱివేల్ప! పసిఁడిదువ్వలువదాల్ప!	59
సీ.	నెఱులు చిక్కెడలించు నెపమునఁ జేయెత్తఁ \| గక్షదీధితులు చీకాకుపఱుప, పనిలేని పనిఁ బల్కు నీ పల్కుల పానకం \| బొదవి కెంబెదవి నోరూరఁజేయఁ గైతప్పి పడు బంతికై తగ్గు జగ్గునఁ \| తరుల బిత్తరము తత్తరము నింప, నొఱపుగా మైనిక్కు నూనఁ బిక్కటిలు ఱొ- \| మ్ములవి చాల విరాళి మొనయఁజేయ
గీ.	గాటమగు ప్రేమ మది నాఁడు నాటఁ బట్టి \| నెట్టుకొని యల్ల రాధపైఁ బుట్టె నిట్టి మమత నేఁ జెల్ల! తన చెల్వు మచ్చుఁ జల్ల \| బళిర కఱివేల్ప! పసిఁడిదువ్వలువదాల్ప!	60
సీ.	శయ్యనొయ్యన నతిశ్రమ మీఱ నొకయోర \| నోరగా గూర్చుండి యొరఁగి రాధ యూర్పులు డాచేతి దార్పులు నీకబ్బ \| గేల్దమ్మి చెక్కిటఁ గీలుకొలిపి నుదుటి క్రొంజెమటబిందువులు పాపటఁ జేరు \| ముత్యాల కొక క్రొత్తమురుపు హత్తఁ జెక్కుటద్దములపైఁ జేర్చిన నీలంపుఁ \| దళుకన జాఱుకొ ప్పలమికొనఁగ
గీ.	నర కవుఁగిలింత యినుమడి యావులింత \| మైవిఱుపొకింత నిద్దురమబ్బు కొంత కలగలుపు గాఁగఁ గడువింతఁ జెలఁగెనంత \| బళిర కఱివేల్ప! పసిఁడిదువ్వలువదాల్ప!	61
సీ.	కబరీభరము వీడి కడుహొయల్నెఱపుచు \| డామూఁపుపై చొకాటంబు నింపఁ, బొరిపొరిఁ బుచ్చు నూర్పులసారె చనుదోయి \| నిక్కి పయ్యెదపైనఁ బిక్కటిల్ల, సొంపున నరసొక్కు చూపులచే నిక్కు \| బెళుకు కన్గ్రేవల బిత్తరింప, నొఱఁగి నీ భుజపీఠి నూనిన చెమటఁ గ్రొం- \| దళ్కెక్కు చెక్కుటద్దంబు గులుకఁ,
గీ.	గోరికలు పండ నొకదండఁ గూరుచుండ \| రాధ మైదోపు జిగుల రారాపు మెచ్చు కోపు నీ చూపు తరితీపుఁ గొలుపనోపు \| బళిర కఱివేల్ప! పసిఁడిదువ్వలువదాల్ప!	62
సీ.	అలిగి నీ వటుమొగంబౌచును సెజ్జపై \| కే ల్తలాడఁగ నొత్తిగిలిన, వేఁడు- కొను రీతి నుదుటుఱొమ్మున వెన్ను నదుమఁగాఁ \| జయ్యన దాని కీల్జడను బట్టి, కదియ రాఁ దివిచి సొంపొదవించుచును దానిఁ \| దగఁగ నెన్నొవిధాలఁ దనివిపఱచి యుగ్గడించుచు దాని యొప్పుల కెదసొక్క \| గిలకిల నగుచును వెలయునట్లు
గీ.	నిచ్చనిచ్చలు నీరీతిఁ బెచ్చుపెఱుఁగు \| మచ్చికలు చేసి పచ్చహుమావజీరు కలన నినుఁ దీటుకొల్పెను గదర రాధ \| బళిర కఱివేల్ప! పసిఁడిదువ్వలువదాల్ప!	63
సీ.	తెరతెర తియ్య వాతెరకొఱుకు మఱిగి \| పల్గొన లేవేళఁ బలువరింపఁ, బలుమొన చుఱుకుసోకుల బారి గడిదీఱి \| తియ్యవాతెర తరితీపు సేయఁ, గ్రొవ్వాఁడి నునుగోటి కొనపోటు మచ్చిక \| నుదుటుఱొమ్ముల నెదురెదురుఁ జూడ, నుదుటుఱొమ్ముల నెదురొత్తు పొత్తున హత్తు \| క్రొవ్వాఁడి నునుగోళ్లు కోరికొనఁగ,
గీ.	నిట్లవయవంబులు దమలో నెనయఁ గోర \| రాధఁ గని నీవు, నినుఁ గని రాధ, తాల్మి నిల్పుటలు లేదుగా యొక్క నిముసమైన \| బళిర కఱివేల్ప! పసిఁడిదువ్వలువదాల్ప!	64
సీ.	నొసటిపై నెసఁగు క్రొమ్మిసిమి లత్తుకజొత్తు \| పువుఁబోఁడి జాడ దౌదవులఁ జెప్పఁ, బ్రక్కసందిలిదండ పెక్కు లెక్కువలౌచు \| బిత్తరికౌఁగిళ్ల బిగువు దెల్ప, కుదురులై యెద హత్తుకొనిన కుంకుమముద్ర \| లింతిగుబ్బల కుదు రేరుపఱుప, నఱుత నురల్చిన యరుణంపు జిగికెంపు \| వెలఁది పైకొనుట వెన్వెంటఁ జాట,
గీ.	తనరు నీ జగ్గు మును సిగ్గుఁ గొనుట యెగ్గు \| మీఁద మిక్కిలి క్రీడించి మెలఁగితేని సారె కా రాధగుట్టు మోసాలఁ బడును \| బళిర కఱివేల్ప! పసిఁడిదువ్వలువదాల్ప!	65
సీ.	పలునొక్కులకు నోసరిలు చెక్కునను జెక్కు \| నధరంబుఁ గదియంగ నద్దుముద్దు, దుడుకుసేతకు సారె సడికొట్టు కైవడిఁ \| బెనుచు వాతెర, పయిఁ బెట్టు మట్టు, నీటుగా వగఁబూను నెపమునఁ దివిరి దాఁ \| జూచుచు ఠీవిని జూపుకోపు, కులుకుగుబ్బల డాఁచికొను హొరంగున నీవి- \| పైఁ బరాకొక్కింత బఱపునొఱపు,
గీ.	మాటిమాటికి గిలిగింత మమత వొడమ, \| నులుకు వగలింపు నెదురింపు లొదవ రాధ, యలుకకూటమి చవిఁ దేల్చెనయ్య నిన్ను \| బళిర కఱివేల్ప! పసిఁడిదువ్వలువదాల్ప!	66
సీ.	మరుఁడేచఁ దమిఱేచ మనమాఁగినను వీఁగి \| వలపాగి చెలరేఁగి పైనివ్రాలి, కళదేర నెలలూర నలరారు చెక్కిటఁ \| గొనగోటి మొననాట గుఱుతులుంచి, జిగిగుల్క వగచిల్క సెగలొల్కఁ గనుమ్రొగ్గ \| నెదపైని యెదనాని యదిమి గదిమి, శ్రమజాఱ వగదీఱ రహిమీఱ మెల్లన \| మునిపంట చుఱుకంట మోవి యాని,
గీ.	యించువిలుతుని కేళి దనియించి తనిసి \| రాధ మదిదీఱ దొంతర రతులఁ దేఱి మఱలఁ దమకించి నినుఁ గాంచి ముఱుపుఁ జూపు \| బళిర కఱివేల్ప! పసిఁడిదువ్వలువదాల్ప!	67
సీ.	ఆణిముత్తెపునత్తు హవుసుగా సవరించి, \| రతనాలబేసరి జతను పఱచి, బసుమాబుటేదారు బలుఫేషు వాజుపై \| చెంపఖల్లీ రుచుల్ చిందుఁ ద్రొక్క సొగసైన బిందీలు తగు చేరుచుక్కతో \| నుదుటిపై నాడుచుఁ బొదలుచుండ సెసిపువ్వు రాఁకడి యసియాడ జడ చాల \| పిఱుఁదుపై హొయలునఁ బెనఁగొనంగ
గీ.	నుదుటువక్షోరుహంబుల హొయలు నింప \| యుపరతుల నిన్ను వింతగా నోర్చు తరుణి యున్నతిని జూచి నీ వెటులోర్తు వహహ! \| బళిర కఱివేల్ప! పసిఁడిదువ్వలువదాల్ప!	68
సీ.	ఆణిముత్తెపుసరుల్ హవుసుగా సవరించి \| రతనాలపోచీలు జతను జేసి బసుమాబుటేదారు బలుఫేషు వాజుడా \| లొలయంగఁ దొడలపైఁ కుబికి నిలిచి “నిబ్బరంబుగఁ జూడు నేఁడిదే నా తమా- \| షా” యని, చెలరేగి చాల నలసి యఱచూపుతోఁ జూచి యనురక్తి లజ్జించి \| ముసిముసినగవున మోము వంచి
గీ.	నన్నుఁ గైకొనుమంచుఁ దా సన్ను తించి \| యొక్కచేఁ బట్టి బతిమాలి హొయలుమీఱ జెలఁగి యొకచేత ఖుర్ణీషు చేసినట్టి వగఁదలఁచుకొన్న నెట్లోర్తు మగలమిన్న \| బళిర కఱివేల్ప! పసిఁడిదువ్వలువదాల్ప!	69
సీ.	విరజాజివిరులతో నరజారు పెన్గురుల్ \| పిఱుఁదుపై మాటికిఁ బెనగొనంగఁ, దోరపుఁబల్కుతోఁ దొయ్యలి తమిచేత \| మనసులోఁ గోర్కులు మసగొనంగఁ, సొగసైన జాళునా తగు గుమ్మటీల్డాలు \| నునుపుఁ జెక్కిళ్లతో నెనయుచుండ, నాణిముత్యపుసరు లలరు మల్లెలసరుల్ \| బిగువుగుబ్బలమీఁదఁ బెనఁగొనంగ,
గీ.	సరుల మెలిదీర్చి పయ్యెదఁ జక్కపఱచి \| సిరులఁ గడుహెచ్చు పడకల్లుఁ జేరవచ్చు రాధ వగఁ గన్న మది నిల్పరాదురన్న \| బళిర కఱివేల్ప! పసిఁడిదువ్వలువదాల్ప!	70
సీ.	అలవోక యువిదదౌ వలుకులు వినవచ్చు \| తడవుగా వినఁ జెవిఁ బడఁగరాదు నిలిచి చూచినబోఁటి నెమ్మేని జిగి దోఁచు \| గనుఱెప్ప లల్లార్పఁ గానఁబడదు కోరినఁ బ్రోయాలు గొనబు మేనది తోచు \| దాసిచే నంటఁగఁ దగులువడదు యాగుబ్బుగాఁ గొమ్మ యంగవాసన వచ్చు \| నరసి మూర్కొన్నచో నటమటించు
గీ.	సేఁపు నను గ్రోల సకిమోవి తీఁపుసోఁకు \| మరులుకొని చేరఁ బిలిచిన మాయమగును మోహభారంబొ? విరహంపు ముమ్మరంబొ? \| బళిర కఱివేల్ప! పసిఁడిదువ్వలువదాల్ప!	71
సీ.	మగరాల బిందీలు సొగసుగా రాణించు \| నల చేరుచుక్కతో నందగింప తళుకుగుబ్బలమీఁద ధగధగమనియెడి \| చంద్రహారంబులు చౌకళింప బాజుబందుల ఠీవి పైఠాణిరవికతో \| బిగిగబ్బిపాలిండ్లు పిక్కటిల్ల కరపల్లవంబునఁ గళుకు లూఱఁగఁజాలు \| రతనాలపోచీలు రవళి నింప
గీ.	పైఁట సరిగంచుపావడపై నటింప \| చిలుక పలుకులతోడ నెచ్చెలిని గూడి- యున్న సఖిఁ జూచి నీ వెట్టులోర్చితయ్య \| బళిర కఱివేల్ప! పసిఁడిదువ్వలువదాల్ప!	72
సీ.	జిలుగులాహిరిదారు బలుకినేరా జరీ \| వజమీఱు బలుఫేషు వాజుఁ దొడిగి, రాణించు వేణిపై రతనాలరాఁకడి \| తళుకులు ముసుఁగునఁ గళుకులూర, హురుమంజిముత్యముల్ హొయలుగాఁ గూర్చిన \| చంద్రహారంబులు చౌకళింప, జాతిడాల్గల బులాకీ తేఁటకెంపుల \| మిన్నాకళాసిగీ వన్నె మీఱ,
గీ.	నతులితంబైన యవయచద్యుతుల నెన్ను \| చెలియ సవరించి ఖుర్ణీషు చేసినట్టి రాధ వగఁ గన్న మది నిల్పరాదురన్న \| బళిర కఱివేల్ప! పసిఁడిదువ్వలువదాల్ప!	73
సీ.	జాళువాబంగారుసరిగతో రాణించు \| జిగికుసుంబావన్నె చీర కట్టి పొందమ్ములందు కెంపులు చెక్కినట్లున్న \| రంతుపాణీవన్నె రవికఁ దొడిగి సంపఁగినూనెచే జారుగా మెఱుఁగాని \| వేణిపై రాఁకడి వెలయఁగూర్చి పసుపునిగ్గులమీఁద నెసఁగు పెన్మెఱుఁగుతో \| నోఱచూపులు చెక్కు లొఱసిపాఱ
గీ.	బోటి హొయలుగ నాలవనాఁటి నీటు \| మొనయ ముఱియుచు నినుఁ జూచి మోము వంచు మేడలో నీవు నొకచెంత మెలఁగునంత \| బళిర కఱివేల్ప! పసిఁడిదువ్వలువదాల్ప!	74
సీ.	నిలువుముకురముల నికరములకళాసి \| గీగోడమేడలోఁ గేళిశయ్య నిదురింపఁగ తలాడ నిల్పి నిద్దంపుఁజె- \| క్కిటను గోరునుప నుల్కిపడి లేచి నెదురఁ గుదురుగం జెన్నొదవు నినుం గని \| ముద మెదఁ బొదలఁగా మదవతియును దగునట్లు కిలకిల నగి తిరిగి కిలకిం- \| చితమున హాసముఁ జేయుచుఁ గది-
గీ.	సి తమిదొట్టిచే మెల్లనఁ జెక్కుగొట్టి, \| పలుపెదవినుంచి నిక్కు నా కులుకులాడి రాధఁ గనకున్న క్షణ మోర్వరాదురన్న \| బళిర కఱివేల్ప! పసిఁడిదువ్వలువదాల్ప!	75
సీ.	రతనాల చేర్చుక్క జతకూడి బిందీలు \| పొదలు నెన్నుదుటిపై ముదము మీఱ జెంపఖల్లీ లందగింపఁగాఁ గుచమధ్య- \| హారముల్ ప్రక్కల నడరి మెఱయ సందిటి మేల్బాజుబందుబంతులు క్రింద \| నందంద యెగసి యుయ్యాలలూఁగ రాఁకడి సెసిపువ్వురంగు పైని చెలంగ \| జడబెడంగు పిఱుందఁ దడఁబడంగ
గీ.	నాణిముత్తెపునత్తు దా నలరుచుండఁ \| గంకణంబులు గలహంస గతుల మ్రోఁగఁ గలికి రతిసల్పు మొలనూలు గల్లురనఁగ \| బళిర కఱివేల్ప! పసిఁడిదువ్వలువదాల్ప!	76
సీ.	అంతటఁ జూచిరమ్మని బాఁజాచి క- \| న్గవ మూఁపులకు నించి కౌగిలించు బటువైన గబ్బిగుబ్బలజో డెదను నాట \| బిగువుమై మైఁజేర్చు బ్రేమఁ గూర్చు దక్కితివింక నాథా యని జడఁజుట్టి \| కట్టివైతునటంచు గరిమ నించు మునిపంటిమొన నాట మొనసి వాతెర తేట- \| లెమ్మె మీఱఁగఁ గ్రోలి యెసకమెసఁగు
గీ.	నిచ్చనిచ్చలు నీరీతి పెచ్చుఁ బెరుఁగు \| దుడుకుసేతల రాధావధూటి నీకు నించువిలుకానియెలగోలు సంచుఁ దెలిపె \| బళిర కఱివేల్ప! పసిఁడిదువ్వలువదాల్ప!	77
సీ.	ఆ రాధ వాతెర యామతింపుల, నందె \| మొఱయింపుల, హవణింపుల, నద నెఱి- గింపుల, నర గనుపింపుల, మయి పుల \| కింపుల, నలుక రెట్టింపుల, నగి- యింపుల, నలుక వారింపుల, వదలని \| యింపుల, నాదరింపులను గొలుపు పొలుపు, వలపువిలుఁబూనువాని కలన \| నందింపఁజేసెఁగా నహహ! నీకు
గీ.	వేగిరంబెంత? వెఱఁగెంత? వేసటెంత \| వెల్లఁబాటెంత? వెగటెంత? వేఁగుటెంత? యువిద యొక యింత యెడబాసి యున్నయంత \| బళిర కఱివేల్ప! పసిఁడిదువ్వలువదాల్ప!	78
సీ.	జిలుఁగుబుటేదారుచీరపై నపరంజి \| గంటలు మొలనూలు గల్లురనఁగ, రవికాంతి హవణించు రవికసందిలి బాజు- \| బందుల మేల్‍కుచ్చు లందియాడఁ బాపట చేర్చుక్క పచ్చలబిందీలు \| పొదలుచు నుదుటిపైఁ గదలుచుండ, రతనాలబేసరి జతను కెంపుబులాకు \| నాణిముత్తెపునత్తు హవుసు మీఱ, కొదమతుమ్మెదగుంపు నదలించు కీల్జడ \| యరవిరిపాన్పుపైఁ బొరలుచుండ
గీ.	వలపులీడేరఁ గళలూర వగలు మీఱ \| నడుము జవ్వాడ పిఱుఁదు లానందమొంద సరసముగ రాధ నీచెంతఁ బరఁగునంత సోయగంబెంత? సొలపెంత? సొక్కుటెంత? \| సాహసంబెంత? సౌరెంత? సరసమెంత? వెఱఁగుపడుటెంత? యొకచెంత వెఱపు కొంత \| చిఱుచెమటలెంత? శ్రమయెంత? సిగ్గు కొంత దాని వగలెన్న వాణీశుకైనఁ దరమె? \| బళిర కఱివేల్ప! పసిఁడిదువ్వలువదాల్ప!	79
కఱివేల్పుశతకము సంపూర్ణము.