శ్రీమహాభారతము - మౌసలపర్వము - ఏకాశ్వాసము - ద్వారకాపురంబున మహోత్పాతము లనేకములు పుట్టుట - కవిత్రయ భారతము - కవిత్రయము - నన్నయ - తిక్కన - ఎఱ్ఱన - ఆంధ్రమహాభారతము

ద్వారకాపురంబున మహోత్పాతము లనేకములు పుట్టుట (సం. 16-3-2)

క.	నీలపింగళ దేహమాభీల భంగి \| కముగ నమ్మెయి వర్తించు జముఁడు సకల వృష్ణి భోజాంధకోత్సాది విహరణమున \| మునుల శాపంబు ప్రేరేఁప మనుజనాథ!	018
సీ.	చిలుకలు గూబల యెలుఁగుల చందంబు \| దోఁపంగ నఱచు రాత్రులను దినము లందును నక్కల యట్లు మేఁకలు గూయు \| మొదవు పిండునకు గాడిదలు పుట్టు; ముంగుల కుదయించు మూషికంబులు గుక్క \| లెల్లను బిల్లుల నీను; బలుఁడు హరియును దక్కంగ యాదవ నివహంబు \| బ్రాహ్మణప్రతతికి బాధసేయు
తే.	గురుల కవమాన మొనరించుఁ దిరుగు లజ్జ \| విడిచి యభిలాషముల వెంట విభుల పంపు సేయ కున్మార్గములఁ దమ చిత్తములకు \| వచ్చినట్ల వర్తింతురు వనిత; లధిప!	019
క.	అనలములు హోమకాలం \| బున నానాభూతవర్ణములతోడ శిఖల్‌ మనుజేశ్వర! వామావ \| ర్తన మొందఁగ నుగ్రగంధ రౌద్రంబు లగున్‌.	020
క.	విను కూడుగూరపాకము \| గనుఁగొని ప్రొయివాపి డింపఁగా నప్పు డసం జనితములై ప్రువ్వులు గల \| గొన మిలమిల మెదలునందుఁ గురుకులముఖ్యా!	021
సీ.	అనుదినంబును నిట్టు లశుభసూచకములు \| దోఁపంగ సర్వవిదుండు కృష్ణుఁ డంతరంగమున సమాలోచనము చేసి \| ‘గాంధారి పుత్రశోకమునఁ జేసి కోపంబు గదిరిన శాపంబు ముప్పది \| యాఱవునేఁ డెల్ల యాదవులకు నాశ మన్యోన్యహననమున నగుటకు \| నిచ్చె నిష్ఠించి; యయ్యేఁడు వచ్చెఁ
తే.	దప్ప దది ఫలించు; దానికి తీర్థ స \| మీప భూమియైన మేలుగాదె!’ యని నరేంద్ర! యమ్మహాత్ముఁ డీ భంగి నూ \| హించి తెఱఁగు నిశ్చయించెఁ దివిరి.	022
ఆ.	అట్లు నిశ్చయించి, యాదవ నివహక్ష \| యంబు దివ్యబుద్ధి నరసి యపర దివసకలిత మగుటఁ దెల్లంబుగాఁ గని \| కొని యతండు పెద్ద కొలువులోన.	023
ఉ.	‘జాతర సేయఁగా వలయు సర్వజనంబులు నంబురాశికిన్‌ బ్రాతిగ భక్తితోడ’ నని బంధుల కెల్లను జెప్పి, వీట వి ఖ్యాతిగ నప్డు సాటుటకు నర్హునిఁ బంచిన ఘంటికాస్వనో పేతము గాఁగ వాఁ డెలమిఁ బెద్దయెలుంగునఁ జాటె నెల్లెడన్‌.	024
సీ.	ఆ రేయిఁ గల నెల్లవారును గోరదౌ \| డలును నల్లని మేను గల నెలంత యొక్కత యిలు సొచ్చి యువిదల నీడిచి \| కొని పోవ శస్త్రాస్త్రకోటి కేతు చయమును భూషణ సమితియు రాక్షసు \| లపహరింపఁగఁ గని రపరదినము నందగ్నిదత్తంబు నబ్జనాభంబును \| నైన కృష్ణుని చక్ర మద్భుతముగ
ఆ.	నెగసి యఖిలజనులు నీక్షింప దివమున \| కరిగె; నమ్మహాత్ము గరుడకేత నంబుఁ దోన చనియె నరవర! రోహిణీ \| తనయు తాటిసిడము ననుసరించె.	025
తే.	వినుము సుగ్రీవమును శైబ్యమును వలాహ \| కంబు మేఘపుష్పంబు నాఁ గలుగునట్టి వాహనంబులతోఁ గూడ వాసుదేవు \| తేరు తదవసరంబున దివికి నరిగె.	026
క.	‘వెడలుండు తీర్థయాత్రకుఁ \| గడువేగం’ బనిరి సురలు గగనంబున న ప్పుడు సువ్యక్తముగా నె \| క్కు డెలుంగులు సెలఁగ రాజకులమౌళిమణీ!	027
క.	అవి గనియు వినియు నులుకక \| సవరణ లొప్పార నపు డసంభ్రములై యా దవులు మనోజ్ఞములగు సీ \| ధువులును మాంసములు వేడ్కతో నింటింటన్‌.	028